السبت، ديسمبر 13، 2008

sorry 2008


اصدقائي الاعزاء


كلكم بجد وحشتوني جدا

انا عارف ان في ناس كتير زعلانة ويمكن قاطعتني علشان مش برد علي التعليقات وناس تانية زعلانة اني مش بروح ابص عليها

بس والله عموما انا كتير بروح عندكم اقري الموضوعات بس مش بعلق لاني مش بعرف اجامل في التعليق يعني مش بحب اكتب اي تعليق وخلاص ياريت تسامحوني

وبعتذر لغروب وبوسي وندا لاني مش حليت التاج برضو مش عارف اركز لاني المفروض احل التاج بجد يعني الناس تفهم منه حاجة

وبعتذر لكل الناس اني مش عملت ابو العيال او اخوهم الكبير او حتي الصغير وعيدت عليهم واديتهم العيدية وخاصة يويو اللي بتموت في الفلوس

بعتذر لفهرنهايت وبقولو الدنيا مش ناوية تجيبها لبر علي طول دوامات وساقية

بعتذر لقلبي اللي منفضلو وعمال اصدموا كل يوم بشيء اسوأمن اللي قبلو وبقولو تفتكر هي دي ]نيتنا ولا حتي حياتنا ولا احلامنا سوا

ظالمك معايا بس مش عندي حل تاني

بعتذر لقلمي اللي دايما ناسية ومش راضي اكتب حاجة رغم غزارة الافكار وعارف انك بتقول حمار مضيع وقته في كلام فاضي بوعد ياقلمي انك تكون كل حياتي وتاخد حقك

بعتذر لاوضتي الضلمة اللي هجرتها وعشت في ضلمة الدنيا الكبيرة وعارف انها بتلعني وبتشتاقللي بس بجد انتي اكتر حاجة برتاح معاها بس مشعارف اعيش فيكي زي زمان وعارف ان رحلة البحث عن شعاع نور انتي بطلتها الوحيدة


بعتذر للابتوبي العزيز اللي مطلع عينو علي الفاضي والمليان وانا نايم وانا صاحي وعارف انو بيدعي عليا وعايزني اشتري بطارية وعايزني ارحمو شوية وبقلهالو لازم تموت قبل ما حققلك احلامك


بعتذر لدموعي وعيوني وبقول امتي اشوف الصح الصح والغلط غلط علشان كل دمعة تنزل تكون تستاهل وبقول لعيوني مشعارف فعلا المفروض البس نضارةولا ايه


بعتذر لاحلامي ولطموحاتي وبقولهم بكل حزن اسف جدا اسف طول العمر مشقادر اعمل حاجة غير اروح ارمي دموعي جنبكم مشعارف ليه دايما كل يوم بتنازل عنكم يوم ورا يوم انا ماستهلش اصلا الاحلام دي او الطموحات دي


بعتذر لاغنيتي المفضلة علشان نسيتها وهجرتها والكارفات المفضل عندي علشان اتخنقت منه بعتذر لنفسي اللي مقصر معاها في كل حاجة لا اكل ولا شرب ولا حتي شوية ضحك وبوهم نفسي اني بعمل رجيم علي الرغم اني مش بخس


بعتذر لثقتي بنفسي وخايف اكون بقيت مغرور علشان كدا اختلفنا علشان كدا كل يوم اسوأمن اللي قبلو

بعتذر للزمن اني دايما بلعنو رغم انو مالوش ذنب


بعتذر للحب والرومانسية ومش قادر اقولهم غير كان نفسي افضل طول العمر احب قلب واحد طول العمر واخلق حكاية من فصل واحد ورواية من بطلة واحدة واكتب احاسيس جميلة بريئة واحدة ماعرفش معاني تانية اتعلمتها غصب عني ونسيتني اهم حاجة الحب

عرفت الغدر ..الكذب .. الخيانة.. الشماتة ...الخ


بعتذر لكل الناس اللي بحبهم اني مقصر ونسيهم لاني بجد ناسي نفسي


بعتذر للسعادة وبقولها ليه دايما متخانقين ياحبيبتي ليه دايما بعيدة عني ليه دايما تايهين من بعض


بعتذر للامل وبقولو عارف انك مصدوم فيا عارف انك لحد انهاردا مش مصدق اني استسلمت عارف انك قولت مافيش فايدة اسف علي الازعاج مش حخبط تاني ياريت تنساني


بعتذر لقوانين العالم لاني افتكرت يوم اني ممكن اغيرها اني ممكن اكون جدير بشيء يستاهل بعتذر لكتب القانون والدساتير والمحاكم لاني بجد مقدرتش اكمل في عالم المشكلات ربما حقا الآن لا اعرف سوي المشكلات هل تقبلوني ثانية ؟؟ الرفض جزائي ؟؟؟ لن اتعجب من الأجابة البتة


بعتذر للغة الانجليزية واللغة الروسية والهولاندية وبقول نسيتكم لاني غيرت كاريير حياتي عارف ان مش من حقي اعتذر


بعتذر لمباديء عمري وبقلها لافائدة من البكاء علي اللبن المسكوب


بعتذر للحياة لاني مش عرفت قيمتها


بعتذر لاموالي اللي ضيعتها في كل رخيص وعلي كل رخيص


بعتذر لمشاريعي لاني مش اهتميت بيها وسبت كل حاجة ضاعت


بعتذر لتليفوني اللي كلمت منه اللي يسوي واللي مايسواش وسهر معايا كتير من غير ذنب


بعتذر لحب عمري وبقولو كنت مؤمن ان الحب حالة جمود تظل طول العمر بس للاسف اكتشفت انو بداية لتطور غريب زي التطور الطبيعي للحاجة الساقعة خايف بجد احب تاني لاني مؤمن ان التطور موجود انا محتاج حالة جامدة لا تتغير طبعا بعتذر لحالة لن تتحقق تتنافي مع قوانين الكون وطبيعة البشر والمعادن وتفاعلات الفلزات


بعتذر لهواياتي اللي كل يوم بفقدها واحدة ورا التانية ودا طبيعي ناتج من اهمالي وذنوبي بتمني ربنا يسامحني


بعتذر لافكاري اللي بس تاعب عقلي انه يفكر وفي النهاية مجرد فكرة بنساها دايما




مكسوف اعتذر لوالدي انا خيبت امالو ومكسوف ازور قبره وشكلي هفضل طول عمري احلم اروح هناك بخبر يفرحو


مكسوف اعتذر لربنا لاني خونت الأمانة ومحافظتش علي النفس وارتكبت الكبائر والصغائر عارف اني شوفت الموت كتير ومش اتعظت حاسس بجد مافيش فايدة


آخر اعتذار

بعتذر لسنة 2008 لاني غيرت كل خططي ونسيت كل حاجة وعدتها بيها وخايف اوعد 2009 علشان بجد مش عندي احلام ليها دلوقت عموما حخطط وافكر واوعدها

بعتذر لحواء لانها اصبحت غريبة الاطوار لم اعد استطيع التفاهم معها
بعتذر لآدم وبكتبلو بدموعي دلوقتي عارف اني اختلفت وعارف انك ندمان لان عمرك ماعتزرت ودايما كنا عارفين سكة واحدة مع بعض سكة نجاح مع انسان قوي للأبد
اسف آدم لانك انا


14 رأيك:

غير معرف يقول...

آدم
مش عارفه اقولك ايه
يمكن كلامك تعبني اوي لاني جوايا كتير يشبهه
لكن تفتكر الاعتذار هيجيب نتيجه؟؟؟؟؟؟

ANGHAM ALLAM يقول...

ايه بس الاحاسيس الصعبه دي
روق كدا واضحك للدنيا
:))

habiba يقول...

كتير بنكون حاسين اننا محتاجين نحاسب نفسنا ونقف قدامها
لكن حاسه ياادم ان حسابك تعب نفس مش حساب نفس
لو حسابك مع نفسك ده علشان تقف وتصلح هيبقى صح جدا
انما حاسه فى كلامك نبره يأس ماعرفتهاش عليك

ماتقفش كتير قدام الامك وخلى اللى فات دفعه للى جاى مش احباط وانكسار لانك اقوى من الهزيمه مش كده ؟

رندا يقول...

كل دى اعتذارات

طيب اقولك على حل ماتبدأ من اول اعتذار وتغيرة تيجى نغير كتير ايوة انت تقدر مش تقول فات الوقت لا لسة مش فات واحدة واحدة هتلاقيك خلصت كل الاعتذارات والسنة القادمة ان شاء الله هتكتب بوست تغيير الاعتذارات

:)

انا مسمحاك على العموم انك مش جيت عندى بس مش تتاخر اوى يعنى :)

كل سنة وانت سعيد اوى

وردهـ تحمل كل التفائل لسنة جديدة

nonosha يقول...

ايه يا عم البوست الجامد ده وبعدين انت اعتزرت لامة لا اله الا الله وانا ماليش نصيب فى اى حاجه من الاعتزارات دى ولا بلونة العيد حتى بس اكتر اعتزار عجبنى بتاع اللاب توب جاااااااااااامد وعمومآ كل سنه وانت طيب

رؤية يقول...

رغم الاعتذار
صدقنى يبقى الامل
وان شاء الله 2009 افضل

ثق فى ذلك

لك منى كل التحية

princess يقول...

بداية الطريق ان الواحد يقتنع بانه عمل حاجة يعتذر عشانها بعد كده فى حاجة اسمها ايمان بربنا وارادة عشان الواحد يرجع زى الاول
ده مش كلام مرسل
ينفع يتطبق بس لو الواحد عايز
موقفك يبين انك انسان قوى طالما اعترفت
كمل بقى

يوميات نائمة في الأرياف يقول...

عزيزي آدم:
عارف افتكرت اية؟
"علمني حبك أن الدمع هو الإنسان.. أن الإنسان بلا حزن ذكرى إنسان"
===============================
عارف الحزن النبيل؟بجد حزنك حميل جدا ورقيق جدا جدا
طبعا اتمنى انه ينتهي ويزول انا اكيد اتمنى لك كل خير
بس اسلوبك في الكتابة والتعبير عن حالة الحزن دي عجبتني اوي
براااااااااااااافو!
==================================
برضة شايفة نفسي في كلامك
نفس القسوة على النفس
نفس الايلام..نفس التجريح في نفسك
انا بكلمك زي ما بكلم رنا:
لية كدة القسوة دي كلها؟
لو النهاردة محققتش احلامك..حققها بكرة؟
لو القانون مش عاجبك..ادرس غيره.. اشتغل في غيره
لو نسيت الروسي والهولندي.. ارجع ذاكرهم تاني
==========================
ادم
بلاش القسوة دي على نفسك
بلاش تعتذر لأدم عشان هو انت
انت حد كويس اوي
كفاية قسوة بقى
وفكر ازاي تقدر تعيش احلامك وشبابك ومرحك
انا في انتظار ردك
رنا

mohamed ghalia يقول...

إلى جاى أحسن بإذن الله
بالتوفيق
دمت بكل الود
فى حفظ الله دايما

kochia يقول...

اوعد 2009
واوفي

يوميات نائمة في الأرياف يقول...

عزيزي ادم:
كل واحد فيه جواه صفات كويسة..زي ما فيه صفات وحشة
الانسان هو الكائن الوحيد اللي بيحمل بين جنباته كل التناقضات
مفيش حد كل صفاتة حلوة
ومفيش حد كل صفاتة وحشة
ومفيش غير يمكن الرسول علية الصلاة والسلام والانبياء اللي احنا منختلفش عليهم
وان كان في ناس غيرنا ممكن يختلفوا
اللي عايزة اقولهلوك لما قلت لي اني شايفة فيك النص المليان من الكوباية
انت واضح انك انسان طيب جدا ومحترم جدا
بطل تقسى على نفسك
مش عايزة اكرر كلامي تاني
انت تستاهل كل خير
حتى لو جواك حاجة انت شايفها وحشة
كلنا جوانا حاجة وحشة بنحاول نقهرها
بنحاول نقهر عجزنا وخوفنا وجبننا
بنحاول نقهر ضعفنا وعصبيتنا
والمفورض اننا بنعيش عمرنا في كفاح ضد الصفات السيئة والشر الموجود في الدنيا
حاسة انك بتمر بحالة نفسية مش كويسة والله اعلم
بس كلنا بنمر بيها
ولما بتعدي بتحس ان الدنيا الحمد لله بخير وانك كويس
ربنا يكرمك ويقدرك وتطلع من المود ده
تحياتي المخلصة ليك وامنياتي
رنا

حروف (دلو مرة ثانية وجرح ثاني سابقا) يقول...

اية كل الاعذار دية واية الحزن دة كلة انا شفتك معلق في مدونة حاسوباتية وحبيت اشوف مدونتك اينعم كلها حزن بس كل مشاعر حقيقة ممكن تكون اللي انت حاسة ناس كتير حاسينة ومقدروش يقولوة بس انا شايفة ان هي الدنيا كدة لازم نتعلم ازاي نعيشها عشان احنا عابري سبيل الدنيا محطة للاخرة مهما كنا حزنانين لازم نفكر ان حزنا قليل بكتير لحزن ناس تانين تقبل مروري وحبئا امر تاني اشوف عملت ايه سلام

Bosssssy يقول...

سامحني اني اتأخرت عليك أوي كده ... بس أنا مش مقصرة فى حقك انت بس ده انا مقصرة كمان فى حق نفسي ........

لما قرأت البوست بتاعك حسيت انى لازم اكون عارفه اسمك ليه مش عارفة ورجعت لبروفايل التعريف يمكن الاقى حاجة استنتج منها اسمك لكن مالقيتش وفرحت اوى لما لقيت اسمك مكتوب فى اول تعليق ...

انا مش مقتنعة بالتعليقات اللى بيقولولك فيها بالراحة فيها على نفسك والحاجات دى ... لا انا شايفة انك لازم فعلا تقسو على نفسك بس القسوة اللتى تغير للأحسن مش للأسوأ ...

عارف ياأدم انا كمان عاملة فى نفسي اليومين دول نفس الحاجات اللى انت عاملها فى نفسك دى .... بس انا عاملة كده عشان عاوزة اكون احسن .. عشان اقدر احقق احلامى اللى انا طول عمرى بحلم بيها .........

ومش كل الاعتذارات اللى انت قدمتها دى عندك حق فيها اوعى تقول لاحلامك وطموحاتك انا اسف انى رميتكم .... لكن قولهم انا اسف انى اجلتكم لكن اوعى ترميهم ... صدقنى اوعى تخلى الناس الوحشين اللى انت قابلتهم فى حياتك يضيعوا الجزأ الأجمل فيها وهو أحلامك وطموحاتك .......

وبعدين اللى انت فيه ده شويه وهيروح لما تقابل الاحسن واعرف ياصديقي اننا بنقابل الوحش فى الدنيا عشان نقدر قيمة الحلو ونحافظ عليه لما نلقاه ......

وبعدين ياادم انت حاسس بالى انت فيه ده وانت وسط اهلك واصحابك يعنى لما تتضايق هتلاقى حد تتكلم معاه ، طب تقول ايه بقى لواحده نفسها اصلا تلاقى حد تتكلم معاه لكن لاسف مفيش ادامى غير حيطان الاوضة ومكتبى فى الشغل ...

قول الحمد لله كتير واوعى تيأس ودور ع الحلو تلقاه وبعدين ده انت ماغلطتش غطة سيدنا ادم عليه السلام ولا حاجة عشان تبهدل نفسك كده .... هو غلط غلط فظيع ومع ذلك مايأسش من رحمة ربنا يبقى ازاى انت تيأس كده .......

خدلك يومين بهدل فيهم نفسك زى ماانت عايز بس لازم تجيلنا البوست الجاى بحاجة جديدة اجمد من كل اللى فات بس تكون حاجة فرايحي ...وكمان لازم ترجعلنا بسرعة عشان تاكل بسلة من ايديا ..... انا بهديك طبق البسلة اللى انا حاطاه عندى فى البوست ... يلا ياسيدى هيص بقى ...ههههههههههههه
واما ترجع قولى بس وانا اعملك جنبه طبق رز وربع كيلو لحمة هههههههههههه

اتمنى انى اسمع عنك كل خير قريب ان شاء الله .........

مع تمنياتى بالتوفيق

بووووووووووسي

yoyo يقول...

عزيزى آدهم

لا داعى لهذا الكم من الاعتذارات
اللى بيحب انسان مش بيعرف يزعل منه بس بيصعب عليه بعد اعز واغلى الناس عنه

ماشى ماشى هو أنا بموت فى الفلوس اوى كدا ولا انت اللى بخيل يا ساتر على كدا هههههههههههههههه

شىء جميل اوى ان الانسان يتحاور مع نفسه و يتناقش معها و كمان يحاول انه يصلح سلوكياته ويصلح من نفسه هو شخصيا
لا تبكى على اللبن المسكوب ولكن اجعل منه وسيلة وتعلمت منها ولا تجعله عاقبة فى طريقك ولكن دفعة إلى الامام
وان شاء الله القادم أجمل و احلى
خطط واوعد 2009 وانش اء الله تحقق كل اللى تتنماه

ربنا يسعدك ويسعد قلبك يارب
تحياتى
يويو